CEBU, Philippines - Gihulagway ni Capitol Consultant on Information Rory Jon Sepulveda nga si City Traffic Office Management Chief Executive Arnel Tancinco nga ‘nagyagayaga’ sa pagtambag niini sa Kapitolyo nga adto moduol kang Cebu City Mayor Tomas Osmeña aron iuli ang flat bed trailer nga giguroy sa Citom diha sa may Fuente Osmeña ning siyudad sa Sugbu.
Sumala pa ni Sepulveda nga dili mahitabo nga moduol ang kapitolyo ngadto sa city hall tungod kay naklaro man sa Provincial Legal Office nga walay igong basehanan ang Citom sa pagguroy sa nahisgutang flat bed trailer.
Matud pa ni Sepulveda nga si Tancinco maoy angayan nga mouli sa maong ekipo sa lugar diin kini gikuha.
Si Sepulveda miingon nga magpaabot sila sa tubag ni Tancinco sa ilang gidemanda ug sa pagpupos sa lima ka adlaw nga tagal una pa sila mopasaka og kaso batok kang Tancinco lamang.
Gipahibawo niining ang gobernadora mihatag og authorization ngadto kang Provincial Attorney Mariano Martinquilla nga moduso og kaso batok kang Tancinco hangtud sa adlaw’ng Biyernes.
Dugang pa niini nga posibleng mopasaka sila og kasong kalapasan sa “Anti-graft and Corrupt Practices Act” ug ang kasong qualified theft. (BANATNEWS)