Digal: Joavan angayang magpa-rehab

CEBU, Philippines - Si Sr. Supt. Erson Digal hepe sa kapolisan sa lalawigan mitambag kang Talisay Mayor-elect Socrates Fernandez nga ipa-rehabilitate ang iyang sinagop nga si Joavan Fernandez subay sa kaniadto tambag usab ni Kong. Eduardo Gullas sa mayor.

Ang tambag ni Digal may kalambigitan sa laing kontrobersya niadtong Sabado sa hapon human si Joavan gipasanginlan sa gwardiya sa Vista Grande nga si Cleto Dandan nga nanion og pusil.

Si Digal nagkanayon nga usa ka buotang amahan ang mayor ug tungod sa pagpunay pabadlong ni Joavan mao kini makaguba sa maayong imahen sa iyang amahan.

Samtang gikumpirmar ni Digal nga tiggamitan og ilegal nga drugas si Joavan.

“We confirmed from our intelligence reports coming from Provincial Anti-Illegal Drugs Special Operation Task Group (PAIDSOTG) nga mogamit gyud na siya (Joavan) og drugas,” matud pang Digal.

“Advise nako sa mayor ayaw labani si Joavan kay kanunay gani labanan mogara hinuon, kay ang pagpa-rehab ni Joavan makahuna-huna na siya unsay maayong buhaton,” nagkanayon si Digal.

Hinuon giangkon niini, nga dili lang si Joavan ang problema diha sa Talisay naa say problema diha sa ginadiling drogas.

Kagahapon sa buntag, nagpinirmahay sila si Joavan ug Dandan nga mag-uliay sa ilang maayong buot diha sa Talisay City Police Station.

Pila ka minutos sa pagpirmahanay mibiya dayon ang duha sakay sa sakyanan ni Joavan.

Ang mayor sa pakighinabi niini sa Banat News kagahapon nagkanayon nga ang iyang anak buot nga makighuyo kang Dandan hinungdan nga nagpunay kini og pangita ngadto sa security guard.

Gibutyag niining ang presidente sa homeowners sa Vista Grande nga si Dearly Anderson mipatawag og meeting kabahin sa nahisgutang insidente niadtong Domingo ug mitambong siya niini uban ni Joavan.

Diha usab ang bise presidente sa homeowners nga si Elizabeth Chan ug ang kaubang gwardiya ni Dandan nga si Elmer Dasmariñas.

Si Anderson ang giingong mihangyo kang Joavan nga makig-uliay sa maayong kabubut-on kang Dandan tungod kay gibati na kini og kahadlok.

Apan gihimakak sa mayor ang pasangil sa giingong pagpanion ni Joavan ngadto kang Dandan tungod kay mismong si Dasmariñas kinsa nag-duty usab niadtong tungora wala makakitang gitionan og armas ni Joavan si Dandan.

Gikatahong duol ra usab kaayo ang sakyanan ni Joavan diha sa guardhouse ug giingong dili pagpanghulga ang gisulti sa anak sa mayor kondili igo ra kining miingon og “wa pa ta mahuman og estorya.”  (BANATNEWS)