Negosyante'g baboy gitulis sa 4 ka tawo

CEBU, Philippines - Usa ka negosyante og baboy gitulis sa upat ka wala hiilhing armadong mga tawo sulod sa ilang balay sa sitio Ginatilanon, barangay Maliao sa lungsod sa Badian sa miaging gabii.

Si PO3 Ivan Rey Juarez sa Badian Police Station miila sa biktima nga mao si Renerio Taypin, 44, nga taga Ginatilanon, usa ka bukirang barangay sa nahisgotang lungsod ug maoy tigpamalit og baboy sa maong lugar. Matud pa ni PO3 Juarez nga ang biktima nga ilang gisukitsukit mitug-an nga nanihapon sila niadtong tungora dihang kalit lang milugapak ang ilang pultahan nga gipatiran sa usa sa mga tulisan uban sa pagsinggit nga “walay lihok tulis ni, ug kuwarta ray among tuyo.”

Unya ang tulo kinsa pulos na hamtong nga mga tulisan mition dayon sa ilang mga armas de fuego ngadto sa biktima ug sa iyang asawa ug mga anak, ug mimando kanila sa pagpahapa uban sa pasidaan nga kun dili tumanon ang ilang mando pamusilon silang tanan.

Matud pa sa biktima nga wala na sila’y kaikyasan pa tungod kay usa sa upat ka tulisan didto man sa silong nagbantay nga kun may moikyas kanila mao usab kini ang malagmit mopatay kanila.

Unya samtang nanghapa ang biktima uban sa asawa niini ug mga anak, gibunlot sa mga tulisan ang biktima   ug gidala sa ikaduhang andana sa ilang balay ug didto gipanguha ang ilang mga butang nga naglakip sa DVD player, upat ka cell phone, kuwentas nga bulawan, singsing nga bulawan, relo de pulso ug salapi nga mokabat sa P50,000.

Midugang si PO3 Juarez nga human makuha ang maong mga butang ug salapi, misibat usab dayon ang maong mga tulisan pahilayo sa maong lugar.

Hangtod ning pagbalita wala pay natumbok ang mga kapolisan nga suspetsado sa maong pagpanulis. - BANAT NEWS