Gipusil, gidunggab sa managsuon

CEBU, Philippines - Patay ang usa ka 26-anyos nga lalaki samtang kritikal ang kahimtang sa kauban niini human sila unaya pagpusil ug gidunggab sa managsuong ilang gikainom kagahapon sa kaadlawon diha sa sitio Riverside, barangay Cansojong, dakbayan sa Talisay.

Wala na makaabot nga buhi sa Talisay City District Hospital si Rolando Canillo, residente sa nahisgutang barangay samtang ang kauban niining si Richard Misterio, lumad nga taga Calatrava, Negros Occidental gibalhin ngadto Vicente Sotto Memorial Medical Center tungod sa iyang kahimtang.

Si Canillo nakaangkon og samad pinusilan sa ibabaw’ng bahin sa tuong dughan nga maoy gituohang nakaingon sa iyang kamatayon samtang si Misterio nakaangkon og samad dinunggaban sa ubos sa tuong bahin sa iyang dughan.

Ang mga suspetsado mao ang managsuong Jun-jun ug Jessie Samarana mga hingkod ang panuigon ug lumad nga taga Guihulngan, Negros Oriental kinsa parehong miikyas human sa hitabo ug padayong gipangita sa mga polis.

Base sa imbestigasyon sa grupo ni PO2 Epifanio Comendido Jr., ang upat nag-inom diha sa diskohan sa gipahigayong disko sa kasaulogan sa pista sa lugar.

Dunay nahitabong kagubot diha sa diskohan tali sa ubang mga nagdisko ug ang duha ka mga biktima misuway pag-ulang sa mga nag-away apan gipusil na hinuon ni Jun-jun si Canillo gamit ang usa ka rebolber ug gidunggab ni Jessie si Misterio gamit ang usa ka hunting knife.

Sa maong sitwasyon naalibwag og panagan ang mga tawo diha sulod sa diskohan sa kahadlok. Ang kapolisan mipahigayon og follow-up nga imbestigasyon sa maong hitabo. - BANAT NEWS