Koreano Nalumos

CEBU, Philippines - Usa ka Korean national nga estudyante sa usa ka unibersidad ning dakbayan ang napalgang patay sa usa ka swimming pool sa Quovadis Beach Resort sa lungsod sa Moalboal pasado alas 10 kagahapon.

Ang biktima nailhan nga si Deok Ki An, 28, lumad nga taga Kangdong-go Seoul, South Korea ug kasamtangang nagpuyo sa syudad sa Sugbo ug nagtungha sa usa ka unibersidad sa Banilad.

Sa pakighinabi sa Banat News kang PO2 Rommel Gako mibutyag kini nga sa wala pa makaplaging patay si Deok, kini ug mga kaubanang pulos usab mga Koreano nagkalingaw og snorkeling sa dagat.

Human niini namalik na sila sa tagsa-tagsa nila ka mga kwarto apan wala nila damhang milahos pa sa swimming pool si Deok nga adunay gilawmong walo ka tiil ug didto nagsalom-salom.

Dangtang pila ka minutos giapas kini sa iyang kaubang si Lee Son Woo ug nakugang nalang nga tua na maghigda sa ilalom sa pool si Deok ug wala na maglihok.

Si Lee daling mitawag sa mga kawani sa maong resort ug gihaw-as si Deok gikan sa pool ug gidala sa Badian District Hospital apan gideklarar kining dead on arrival sa mga doktor.

Base sa pamahayag sa mga kaubanan ni Deok, dili kaayo maantigong molangoy ang namatay, nagduda karon ang kapolisan nga posibleng nalumos kini dihang miambak sa maong pool nga mas lawom pa kaysa iyang height.

Sa pakighinabi sa Banat News sa tagdumala nga usa ka German nga si Gurgen Ost nagkanayon nga wala sila masayod kun giunsa pagkahitabo ang pagkalumos ni Deok.

Sumala pa niini aduna silay mga trained nga lifeguards nga naa magpundo sa ilang dive shop sa resort. Matud pa niini gibana-banang 15 metros ang gilay-on sa maong dive shop gikan sa pool.

Dugang pa ni Ost nga dunay gwardiyang mag-roving sa ilang resort maoy magpunay og pahimangno sa mga guest alang sa ilang seguridad.

Si Gako   mibutyag usab nga base sa ilang pagsukit-sukit walay lifeguard nga nag-apong diha sa maong swimming pool.

Samtang ang giingong ‘trained’ nga mga tawo diha sa dive shop para adto lamang sa scuba diving. - BANAT NEWS