MJ planters napasagdan

CEBU, Philippines - Nagduda si kanhi Dangerous Drug Board undersecretary Atty. Clarence Paul Oaminal nga ang mga kanhi marijuana planters dinhi sa Sugbu ug ubang bahin sa nasud nibalik sa pagpananom niini.

Kini tungod kay ang programa sa DDB nga iyang gipasiugdahan kaniadto partikular na sa paghatag og livelihood program ngadto sa mga nadakpang mga marijuana planters wala na maatiman.

Matud pa ni Oaminal sa interbyu sa DyRF nga nasubo na siya pag-ayo sa maong sitwasyon tungod kay ang kampanya karon sa gobiyerno batok sa ilegal nga drugas wala nay klaro.

Kini tungod kay ang DDB nga gilangkuban sa mga kadagkuan sa kapolisan, militar og drug enforcement agency kon PDEA ug gipangulohan ni DDB Secretary Antonio Villar wala nay regular nga meeting.

Matud pa ni Oaminal nga sigon sa balaod ang DDB mopahigayon og senemanang tigum aron masusi niini ang mga nahimo sa gobiyerno batok sa sindikato sa ilegal nga dugas.

Apan matud pa ni Oaminal nga ang iyang nahibaw-an nga si Villar wala gyud makapahigayon og tigom sa iyang mga sakop.

Kini ang iyang gituohang hinungdan nga wala na kaayo siyay nakita ug nadungog nga mga operation sa kapolisan nga nagmalampuson tungod kay ang nangulo karong DDB lain man ang gi-atiman.

Mipasalig hinuon si Oaminal nga sa higayon nga makabalik sa DDB iyang himuon ang tanan aron mas molambo ang programa sa gobiyerno pagpakigbatok sa illegal nga drugas. (BANAT NEWS)