Enumerators sa NSO-7 napaakan og iro; Laing usa gipagukod og iro

CEBU, Philippines - Mitiyabaw na karon ang pipila ka mga magtutudlo nga nagsilbing mga enumerators sa gipahigayon nga 2010 population and housing census kay napaakan kini sa iro samtang ang uban gipagukod sa iro sa tag-iya sa balay.

Suma pa sa tigpamaba sa National Statistic Office kon NSO-7 nga si Noel Rafols nga may usa na ka mga magtutudlo nga enumerators sa census sa lungsod sa Daanbantayan ang napaakan og iro samtang nagpahigayon og survey niadtong nakalabay nga adlaw.

Matud pa ni Rafols nga misulod sa balay ang magtutudlo aron pagkuha og impormasyon sa nagpuyo sa balay apan gisugat na hinuon kini sa iro ug gipaak kini niini.

Gisusi pa hinuon sa ilang buhatan ang kahimtang sa maong magtutudlo aron mahatagan og ayuda gikan sa NSO sanglit may tulubagon man ang ilang buhatan sa pag-atiman kanila.

Gawas niini may laing maestra ang nagpalaban sa barangay official sa barangay Basak San Nicolas pinaagi sa ilang barangay kapitan nga si George Rama tungod kay may usa ka langyaw nga nakaasawa og Pilipina ang mituyo sa pagbuhi sa ilang German Shepherd aron paggukod sa magtutudlo kay dili kini gustong magpa interbyu.

Ang maong langyaw paatubangon sa usa ka hearing sa barangay aron patubagon sa gihimo niini ngadto sa magtutudlo.

Tungod niini, si Rafols mipadayag sa ilang kasagmuyo sa nahitabo sa ilang mga enumerators ug nanawagan sa publiko nga moabag sa ilang gipahigayon nga census.

Wala hinuon gitumbok niini kun ang NSO moabag sa mga enumerators sa pagpasaka og kaso batok sa tag-iya sa mga iro kun mapaakan samtang naghimo sa ilang trabaho isip kaabag sa NSO. (BANAT NEWS)