2 nalumos!

CEBU, Philippines - Nangalumos patay ang duha ka mga batang babayeng nagpangidaron og otso ug sayes anyos dihang napasagdan kini nga nagduwa sa dagat diha sa barangay Looc siyudad sa Danao niadtong Biyernes sa udto kagahapon.

Ang nangalumos mao sila si Riza Labador, 6, ug Jackelyn Loygos, 8, tinun-an sa grade one ug pulos molupyo sa nahisgutang lugar pulos wala nay kinabuhi dihang nahaw-as sa dagat.

Matud pa ni SPO4 Jose Salingua Jr. sa Danao City Police dihang nahinabi sa Banat News, ang mga bata nakit-an pa kini sa usa ka Sonny Bucalig, alas 10:30 sa buntag nga nagduwa sa mabaw nga bahin sa dagat dapit sa baybayon dili layo sa ilang pinuy-anan.

Apan sa pagka alas 12:25 sa udto samtang nanglaba si Bucalig sa iyang mga sinina sa gawas nga bahin sa ilang balay dapit sa baybayon mao nalay iyang namatikdan nga dunay duha ka lawas sa mga batang naglutaw na ug wala nay panimuot hinungdan nga iyaha dayun kining gitabang aron unta pagsalbar niini.

Daling gihatud ang mga bata sa Danao District Hospital apan gideklarar kini sa mga doktor nga mga patay na.

Gituohang napasagdan ug wala sab mananghid ang maong mga bata sa ilang ginikanan sa pagpangaligo sa dagat nga sila lang duha hinungdan nga nangalumos.

Base sa pamahayag sa mga ginikanan sa mga bata ngadto sa kapolisan, wala sila masayod nga nangaligo diay sa dagat ang ilang mga anak gumikan kay wala usab kini mananghid ngadto kanila.

Nunot niini gitakdang ipatawag sa kapulisan ang mga ginikanan sa mga bata aron sukit-sukiton kabahin sa maong panghitabo pagtino kun aduna ba sila’y tulubagon sa nahitabo sa duha.

Samtang lakip sa susihon kun wala bay foul play ang kamatayon sa duha. (BANAT NEWS)