Suspek sa pagpatay sa kapitan nadakpan

CEBU, Philippines - Ang gidudahang suspetsado sa pagbanhig patay sa kanhi barangay kapitan sa Ocana, dakbayan sa Carcar, ug paglabay’g granada sa usa ka tigulang babaye didto sa barangay Napo, sa maong dakbayan, kapin na sa bulan ang nakalabay nadakpan sa miaging hapon sa buy bust operation sa mga sakop sa Regional Anti-Illegal Drugs Special Operation Task Group (RAIDSOTG) sa Police Regional Office-7 inabagan sa Carcar Police Station.

Ang nasikop mao sila si Adrian Labra, anak ni barangay kapitan Mario Labra sa Napo ug Claire Sanchez “Alias Big boy” giingong anak sa gawas sa pamilyang Velez.

Si PRO-7 Chief Supt. Lani-O Nerez sa press conference kagahapon nagkanayon nga dili pa hinuon nila matumbok nga suspek sila si Labra ug Sanchez sa pagbanhig patay ni anhing barangay Kapitan Jose Diac Husain didto sa Ocana duha na ka semana ang nakalabay sanglit ipaubos pa nila sa makuting imbestigasyon.

Sa nasayran, si Husain gibanhigan patay sa wala mailhing tawo ug gipaulanan og bala ang gidalang multicab niini samtang padung sa ilang pinuy-anan gikan sa barangay hall sa Ocana duha ka adlaw human sa piniliay niadtong Mayo 10.

Si Labra ug Sanchez nakuhaan og usa ka putos kansang sulod gidudahang shabu ug usa ka .45 nga kalibre nga pistola atol sa maong operasyon. Si Nerez miingon nga sa pagkakaron wala pa silay saksi nga magtumbok nila ni Labra ug Sanchez nga maoy mibanhig patay ni Husain.

Gani matud pa niya nga manguha pa sila og dugang impormasyon ug susihon usab nila ang armas ni Labra sanglit ang gigamit sa mamumuno kang Husain mao ang .45 nga kalibre sa armas ug 38 kalibre nga revolver. Sila si Labra ug Sanchez hugtanong mihimakak sa pasangil nga sila maoy nagpatay kang Husain sanglit matud pa nila nga didto sila sa ilahang panimay uban sa ilang pamilya niadtong higayona dihang gipatay ang biktima.

Nagtuo hinuon ang duha ka suspetsado nga adunay kalambigitan sa politika ang pagkasikop kanila.

Ila hinuong giangkon nga ila kadtong shabu nga nakuha sa mga otoridad apan ila lang kadtong konsumo ug dili kadto para baligya.

Matud ni Nerez sila si Labra ug Sanchez anaa sa watchlist sa Philippine Drug Enforcement Agency (PDEA)-7 nga tigpayuhot og ginadiling drugas ug gani nabutang pa ang duha sa order of battle sa Philippine National Police (PNP) dinhi sa rehiyon siyete.

Sumala pa ni Nerez nga ang duha ka suspek maoy kauban sa mga Velez kinsa gipasanginlang lider sa tigpayuhot og ginadiling drugas sa Carcar ug kasikbit nga kalungsoran sa probinsya ug uban pang lugar sa rehiyon siyete.

Sa iyang bahin si Sr. Supt. Erson Digal hepe sa kapolisan sa lalawigan mitug-an nga nakadawat sila og report nga sila si Labra ug Sanchez maoy suspek sa paglabay’g Granada niadtong milabay’ng buwan didto sa Napo sa panimay sa usa ka tigulang babaye.

Hinuon nagkanayon si Digal nga sa pagkakaron padayon pa sila sa ilang gihimong pakisusi ug pagpanguha og dugang impormasyon ug mga saksi.

Nagtuo si Digal nga adunay mopatim-aw nga saksi sa maong krimen kay iyang gikuhaan og pananglitan ang nahitabong pagpangrakrak sa barangay kapitan didto sa duha ka barangay sa lungsod sa Tabuelan niadtong Abril 25 ug Mayo 9, usa ka adlaw sa wala pa ang piniliay. (BANATNEWS)