Hepe sa Dumanjug girilibohan na

CEBU, Philippines - Hingpit nang girilibohan kagahapon ang hepe sa kapolisan sa lungsod sa Dumanjug nga si Sr. Insp. Rodrigo Giangan ug ang gitudlong mopuli kaniya mao si Insp. Rolan Aliser nga gikan sa Provincial Intelligence Branch (PIB).

Si Aliser taud-taud na usab nga nadestino sa Provincial Mobile Group (PMG) didto sa bukirang barangay sa lungsod sa Ronda ning lalawigan.

Si Giangan gihimo na karong deputy sa Administration sa Cebu Provincial Police Office (CPPO).

Gawas kang Giangan, giparilibohan usab ni Sr. Supt. Erson Digal , ang hepe sa kapolisan sa lalawigan, ang hepe sa kapolisan sa lungsod sa Tudela, isla sa Camotes nga si P/Insp. Wilfredo Giducos ,kay matud pa kanunay lang makit-an sa taga Tudelahanon nga perming mahubog.

Si Giducos gidestino na karon sa Naga City Police Station ug ang mipuli kaniya mao si P/Insp. Edward Sanchez gikan sa operation branch sa provincial headquarters.

Si Giangan nga nahinabi sa mga tigbalita nagkanayon nga tipik ug kabahin gihapon sa pamolis ang pagrelibo kaniya kay mag-agad man sila kanunay sa chain of command ug kinahanglang mosunod sa bisan unsang kamanduan sa ilang labaw.

Hugot hinuong gihimakak ni Giangan nga iyang gipasagdan ang kaso sa tulo ka sunod-sunod nga pagpamusil niadtong miaging semana ug ang labing ulahi mao ang nahitabo niadtong Lunes diin usa ka drayber sa habal-habal nga si Edwin Rebiosquello gipusil patay didto sa bukirang bahin sa barangay Lawaan.

Samtang si Giducos mihimakak usab sa pasangil nga kanunay siyang makit-an hubog, ug wala siya mahiubos nga gibalhin siya og destino kay ang importante nagpabilin siya sa trabaho.

Si Digal mipasabot nga ngil-ad ug ma-ot gyud tan-awon sa publiko ang usa ka opisyal maghubog-hubog.

“A good leader, is a good example,” dugang pa niya. (BANATNEWS)