CEBU, Philippines - Nalungag ang tuong bahin sa dughan sa usa ka 45-anyos nga lalaki human gipusil sa usa ka guwardiya sa basketball court samtang gipahigayon ang disko nunot sa nagsingabot nga kapistahan sa bukirang bahin sa sitio Lugwayan, barangay Sta. Rosa, siyudad sa Danao niadtong Huwebes sa alas 9 sa gabii.
Mao pa unta ang pagsugod sa disko ug sa pagsugod og tukar sa unang sonata, nagubot ang mga tawo tungod sa pamusil nga miresulta sa pagka-undang niini nga wala makabawi sa abang sa sound system nga gikontrata og P7,000.
Ang biktima mao si Lito Zuelo, taga barangay Cabungajan, Danao, samtang ang gitumbok nga nakapusil mao si William Laurito, 34, molupyo sa nahisgutang lugar ug usa ka sikyu.
Matud ni SPO3 Winrie Pilapil sa Danao City Police Station sa dihang nahinabi sa Banat News nga si Zuelo misuroy sa maong lugar aron mang-disko apan bag-ohay pang nagsugod ang disko sa dihang gipusil kini ni Laurito sulod sa diskohan.
Milapos ang bala ngadto sa walang bahin sa lawas ni Zuelo nga gidala sa Danao City District Hospital apan gibalhin sa dakbayan.
Si Laurito boluntaryong mitahan. (BANATNEWS)