Trak gibato nakadasmag

CEBU, Philippines - Patay ang drayber sa motorsiklo ug angol ang iyang asawa human madasmagi sa trak de karga nga milikay pagtipas sa pikas karsada sa dihang gibato sa usa ka babaye nga gituohang nalisoan sa pangisip didto sa barangay Bagatayam, lungsod sa Sogod niadtong Huwebes sa alas 11 sa buntag.

Ang namatay dihadiha mao ang drayber sa motorsiklo nga si Nonie Juanisa, molupyo sa barangay Damolog, Sogod ug naangol usab ang angkas nga asawa niini nga si Roselie Juanisa. Samtang ang drayber sa nakabangga nga Isuzu Elf (GXJ-773) nga si Andrew Batucan Perez, 28, ug molupyo sa siyudad sa Danao.

Matud ni SPO1 Arsenio Coming Sr. sa Sogod Police Station sa dihang nahinabi sa Banat News nga ang Isuzu Elf ug ang motorsiklo pulos gikan sa managlahi nga direksiyon.

Ang Isuzu Elf pag-abot sa maong lugar gibato sa usa ka Roquisa Mangubat nga gituohang nalisoan sa pangisip. Aron dili maigo sa mga gilabay nga bato, napugos kini og likay ug mitabok sa pikas karsada.

Naatol nga maoy pag-agi sa motorsiklo nga gisakyan sa mga biktima gikan sa sugat nga direksiyon hinungdan nga nagkadinasmagay kini nga miresulta sa pagkadaro sa motorsiklo nga napasok sa ilawom sa trak de karga.

Ang drayber nga si Nonie gikatahong namatay paglabay sa pipila ka gutlo diha sa karsada human makaangkon og seryosong kadaot sa lawas ug ulo niini nga nabagnos sa semento. Samtang ang asawa niini nakaangkon usab og daghang mga samad ug pangos sa lainlaing bahin sa lawas ug daling gihatod sa Juan Dosado Memorial Hospital sa maong lungsod apan paglabay sa pipila ka gutlo gibalhin kini sa tambalanan dinhi sa dakbayan sa Sugbo alang sa dugang pag-atiman. (BANATNEWS)