Electoral protest gipasaka sa kandidato sa St. Bernard

CEBU, Philippines - Mipasaka og electoral protest ang kampo sa naparot nga kandidato sa pagkamayor sa St. Bernard sa Southern Leyte batok sa nakadaog nga incumbent mayor.

Si mayoralty candidate Jocelyn Lim Bungcaras uban sa iyang runningmate ug mga kandidato sa pagka-konsehal midemanda og manual recount sa ilang mga balota.

Nagduda ang kampo ni Bungcaras nga adunay nahitabong pagpanikas sa nakalabay’ng labing unang automated poll sa nasud niadtong Mayo 10 ug ang resulta nangaparot ang ilang mga kandidato batok sa kampo ni incumbent mayor Rico Rentuza.

Ang maong election protest No. 2010-01 gipasaka na diha sa Regional Trial Court Branch 26 sa Southern Leyte, wala pa usab matino kun kanus-a ang schedule nga pagdungog sa maong reklamo.

Ang pagsang-at sa protesta gihimo ni Bungcaras gumikan usab sa awhag sa iyang mga supporters nga gitawag og “Team Joy” gumikan sa pagtuo sa mga supporters nga sila natikasan.

Ang maong gikwestyong mga balota padayon karong gibantayan sa mga supporters diha sa munisipyo samtang nagpaabot sa desisyon gikan sa korte. - BANAT NEWS