... hepe sa Dumanjug gitagalan sab ni Digal

CEBU, Philippines - Si Sr. Supt. Erson Digal, hepe sa kapolisan sa lalawigan mihatag og tagal sa hepe sa lungsod sa Dumanjug nga si Sr. Insp. Rodrigo Giangan pagsulbad sa kaso nga sunod-sunod nga nahitabong pagpamusil niadtong miaging semana. “Gamay nalang pailob nako sa hepe diha sa Dumanjug basta walay ma file-an og kaso sa tulo ka shooting incidents,” matud pang Digal.

Gibutyag usab ni Digal nga ang Dumanjug maoy usa sa lima ka hepe nga iyang gipanid-an ug gihatagan og higayon pagsulbad sa mga kaso sa pagpamusil sa ilang hurisdiksyon.

Kun kahinumduman niadtong miaging semana gipusil patay si Cirilo Allanic sa ilang pinuy-anan sa barangay Tapon ug giingong supporter ug political leader ni Konsehal Efren Gon-gon Gica kinsa midagan pagkamayor sa milabay’ng eleksyon niadtong Mayo 10 apan gipilde siya ni Nelson Garcia ang igsuon ni Gobernador Gwendolyn Garcia.

Ang ikaduhang nahitabong pagpamusil niadtong Domingo sa kaadlawon diha mahitabo sa barangay Cogon diin ang biktima usa ka 15 anyos nga menor de edad nga lalaki gikan sa disko.

Ang katapusang biktima sa pagpamusil niadto lang Lunes sa gabii diin ang habal-habal drayber nga si Erwin Rebosquillo ang giulo sa pagpusil sa wa mailhing suspetsado didto sa bukirang bahin sa barangay Lawaan.

Si Rebosquillo giangkon ni Dumanjug mayor-elect Nelson Garcia nga iyang supporter sa milabay’ng eleksyon.

Apan si Digal miingon nga subay sa pasiunang pakisusi ni Giangan ngadto sa mga kaparyentihan ni Rebosquillo wala kini gisuportahang kandidato sa milabay’ng eleksyon.  - BANAT NEWS