CEBU, Philippines - Arestado ang manag-agaw human moangkong gi-drama nila ang nahitabong pagtulis kanila aron makuha ang P400 mil nga salapi sa gitrabahoan sa usa sa mga suspek niadtong Mayo 26 ning tuiga.
Ang nangadakpan mao sila si Israel Rebulado, 28, nga utility worker sa Asian Marine Transport Corp. ug residente sa dalan Sikatuna ning dakbayan ingon man ang iyang ig-agaw nga si Ryan Rebulado, 32, nga usa ka barbero ug residente sa Ponce Compound sa barangay Capitol Site.
Ang mga sakop sa Crime Against Property Desk sa Cebu City Police Office pinangulohan sa imbestigador nga Alejandro Lopez misusi sa nahitabong pagpanulis kang Israel Rebulado sa nag-inusarang armadong lalaki.
Si Israel nangangkong gitulis diha sa dalan Osmeña Blvd. sa eskina sa Manalili sa barangay Sto. Niño ning dakbayan ug gikuha ang iyang sling bag nga gisudlan sa P400 mil cash nga gipa-withdraw kaniya sa ilang kompanya gikan sa usa ka bangko.
Matud pa niini gisugo siya sa ilang kahera nga si Violy Loste pag-deposit sa kwartang iyang gi-withdraw sa DBP-Osmeña Blvd. branch ngadto sa Bank of Commerce sa samang dapit apan samtang siya naglakaw kalit siyang gitiunan og kutsilyo sa wala mailhing lalaki ug mideklarar og tulis.
Gumikan sa kahadlok wala na siya makapalag pa ug gihatag ang iyang sling bag.
Apan sa imbestigasyon sa CAPD namatikdan ang wala pagkatukma sa iyang mga naulahi ug nahaunang pamahayag ilabi na sa eksaktong oras ug dapit diin mahitabo ang tulis ug ang deskripsyon sa tulisan. Dihang nagkalisod na kini sa pagtubag sa mga pangutana sa mga imbestigador miangkon kining ‘tulis me’ ang nahitabo ug mibutyag nga human niya ma-withdraw ang salapi iyang gitawgan ang iyang ig-agaw nga si Ryan ug nagkasabot nga ilahang bahinon ang kwarta.
Aron usab duna siya’y (Israel) rason himoan niya kini og estorya ngadto sa kapolisan samtang si Ryan maoy mohipos sa kwarta.
Si Israel human ‘mangumpisal’ sa kapolisan mitultol sa gikahimutangan sa iyang ig-agaw diha duol sa usa ka hotel sa barangay Capitol Site ug diha madakpi si Ryan.
Nakuha diha kang Ryan ang sling bag nga may sulod nga binandol nga salapi, apan sa pag-ihap sa kapolisan atubangan sa representante sa maong kompanya nga si Nelson Uy ug Tirso Uytengso III kuwang na kini og P6,500.
Si Ryan sa tantong imbestigar mipagawas sa iyang gikuhang P2,500 samtang ang ubang kulang nasutang iyang gipangbayad sa iyang mga gikautangan. Sa kinatibuk-an narekober sa kapolisan ang P396,000. - BANAT NEWS