Mga batan-on nasakmita'g revolver ug kutsilyo

CEBU, Philippines - Nasakmit sa kapolisan ang usa ka kalibre 38 nga armas de fuego ug duha ka kutsilyo gikan sa tulo ka mga batan-on didto sa eskina sa highway barangay Basak ug barangay Labogon, dakbayan sa Mandaue sa miaging gabii.

Si PO1 Melvin Pelayo sa Presinto 3 sa Basak Police Station nga nahinabi sa Banat News miingon nga ilang nasakmit ang duha ka kutsilyo nga giluklok sa duha ka pulos tag 15-anyos nga bayong-bayong samtang ang revolver didto masakmit sa 16-anyos nilang kauban.

Matud pa ni PO1 Pelayo nga namatikdan sa mga molupyo sa maong lugar nga nag-estambay ang tulo ka mga batan-on kansang panglihuklihok kadudahan kaayo   hinungdan nga usa sa mga concern citizen maoy mitaho sa ilang buhatan.

Si Pelayo miingon nga ang tulo ka mga dinakpan ilang pasakaan og kaso nga kalapasan sa paghupot og hinagiban nga makamatay ug ingon man kalapasan sa paghupot og armas de fuego nga wala’y lisensiya.

Dugang pa niya nga tungod kay dili man mabalhog sa bilanggoan ang tulo ka dinakpan ang ilang himoon mao ang pagtugyan na lamang sa tulo ngadto sa buhatan sa Department of Social Welfare and Development (DSWD). – BANAT NEWS