CEBU, Philippines - Nunot sa pagbukas sa klase sa sunod buwan, ang kapolisan sa dakbayan sa Sugbo wala pa makadawat og report nga adunay grupo sa mga tulisan nga nangabot dinhi sa Sugbo nga gikan sa laing probinsya.
Si Sr. Supt. Patrocinio Comendador, hepe sa kapolisan ning dakbayan mipasidaan sa mga negosyante nga nanag-iya og establisamento nga magbantay ug alerto kanunay ug dili mokumpiyansa sa pagpatuman sa seguridad.
Kini tungod kay matud ni Comendador karong Hunyo hangtod sa Hulyo maoy kasagaran nga dunay mahitabong tulis dinhi sa dakbayan.
Nahitabo na kini sa milabay’ng Hulyo sa miaging tuig, diin gitulis ang negosyante og alahas ug nadala ang gibana-banang P6.5 milyones sa gipasanginlang grupo ni anhing Roy Quimada.
Gipasabot ni Comendador nga subay sa crime statistics sa ilang buhatan, ang bulan sa Hunyo ug Hulyo taas kaayo ang krimen, sama sa pagpanglabni, tulis ug uban pa.
Kini tungod kay daghang mga bag-ong tinun-an nga gikan sa lain-laing probinsya nga nagtungha dinhi sa Sugbo.
Gawas niini, laing napanglantawan ni Comendador nga motaas ang kaso sa tulis sa susamang mga bulan gumikan kay posibleng may problema sa kuwarta ang mga tulisan nga nagpatungha og anak.
Apan bisan pa kung wala’y nadawat nga taho ang kapolisan kalabot sa grupo sa mga tulisan nga nangabot dinhi, si Comendador makig-alayon sa ubang ahensya sa gobiyerno pagbinayloay og impormasyon aron masigurong walay makalusot nga grupo sa tulisan gikan sa laing probinsya.
Hinuon nagkanayon si Comendador nga iyang gimandoan ang tanan niyang hepe sa onse ka police station nga kinahanglang alerto sila kanunay sa ilang tagsa-tagsa ka hurisdiksyon ilabi na sa pagbukas sa klase karong sunod buwan.
Samtang gipahimangnuan usab ni Comendador ang mga taxi driver nga magmabinantayon sa ilang pagpasakay og mga pasahero ilabina sa mga lalaking mosakay kanila.
Matud niya nga kun duna may mabantayan sa mga driver sa taxi sa ilang pasahero nga kadudahan ang linihokan, kinahanglang mo-report gilayon sa pinakaduol nga police station aron ila dayon kining kaaksyonan. – BANAT NEWS