CEBU, Philippines - Mahinayon gyud ang eleksiyon sa barangay ug Sanguniang Kabataan (SK) karong Oktubre 25, niining tuiga bisan bag-ohay pang nahuman ang poll automation sa nasud niadtong Mayo 10.
Si Assistant Regional Director Veronico Petalcorin sa Commission on Elections (COMELEC-7) mibutyag sa Banat News nga sa pagkakaron gipangandaman na nila ang pinili-ay sa barangay karong Oktubre kay daan na kining gisitar sa Batakang Balaod ug walay napasar ang Kongreso nga balaod sa pag-oktaba sa nahisgutang pinili-ay.
Hinoon giklaro ni Petalcorin nga gipaabot nalang nila ang resolusyon sa Comelec en banc nga magtakda sa petsa sa rehistrasyon alang niadtong mga bag-ong botante ug mga bag-ong transfer gikan sa ubang lugar.
Dugang pa ni Petalcorin nga posibleng mobalik sa mano -mano nga sistema ang eleksiyon sa barangay karong Oktubre tungod kay gawas nga mahal ug daku kaayo og gasto ang pag-abang og balik sa Smartmatic nga mga Precinct Count Optical Scan kon PCOS machine, dali ra usab humanon ang pinili-ay sa barangay tungod kay diha ra man sa presinto sa matag barangay ma-proklamar sa mga magtutudlo ang mananaog sa pagka kapitan, kagawad ug SK.
Sa laing bahin giatiman na usab sa Comelec ang kaso sa mga protesta sa mga politiko bahin sa resulta sa milabay’ng eleksyon niadtong Mayo 10 ilabi na ang sa lungsod sa San Fernando.
Matud pa ni Provincial Election Supervisor Lionel Marco Castillano nga giandam na niya karon ang mga ebidensya kalabot sa protesta nga gisang-at ni incumbent Mayor Lakambini Reluya batok kang Mayor elect Antonio Canoy.
Hinuon matud pa ni Castillano nga dili malangay ang paghusay niini tungod kay kompleto man og mga ebidensya ang Comelec kalabot sa mga butang nga gireklamo ni Reluya. – BANAT NEWS