'Tulisan' napusilan sa bitiis

CEBU, Philippines - Usa ka gipasanginlang notadong kawatan napusilan sa iyang walang bitiis dihang misuway unta og ikyas sa mga polis nga moaresto kaniya diha sa dalan P. Del Rosario sa barangay Sambag 1 ning dakbayan niadtong milabay’ng Lunes sa hapon.

Ang nadakpan mao si Angelo Castello, 34, naangol human kini napusilan sa mga sakop sa Fuente Osmeña Police Station dihang midagan kini pagkahibalong aduna siya’y warrant of arrest.

Si Sr. Insp. Michael Anthony Bastes nga kanhi hepe sa Theft and Robbery Section ug mao nay hepe sa Fuente Police Station maoy nangulo sa pag-aresto kang Castello kinsa notadong ‘akyat-bahay.’

Si Bastes ug mga sakop armado og warrant of arrest sa kasong pagpanulis nga giisyu niadtong Nobiyembre 1, 2009 sa sala ni Judge Rafael Yrastorza sa RTC Branch 14.

Apan dihang gikaatubang ni Bastes ang mga kabanay ni Castello aron kini patahanon kalit nga milayat ang suspek sa atop sa silingang balay hinungdan nga gipusil kini apan wala maigo, dihang giusban naigo ang bitiis niini ug natagak sa yuta. –BANAT NEWS