CEBU, Phillipines - Gipahibawo sa Provincial Agriculture Office nga 26 na ka mga lungsod ug dakbayan ug 10, 221 na ka mga pamilya sa mga mag-uuma ang naapektuhan sa huwaw sa tibuok probinsiya sa unang kwarter ning tuig 2010.
Sumala pa ni Provincial Agriculturist Necias Vicoy Jr. nangadaot ang 5,370. 93 ka ektaryang kamaisan ug 275.95 ka ektaryang kahumayan gumikan sa huwaw.
Matud pa ni Vicoy nga ang labing naapektahan mao ang lungsod sa Sogod kay niabot og 1,388 ka ektaryang kamaisan ang naughan ang yuta, dinhi magsalig ang 2,500 ka mga pamilya.
Ikaduhang naapektuhan mao ang lungsod sa San Remegio nga niabot sa 1, 195 ka ektaryang kamaisan ug 786 ka mga pamilya ang apektado.
Ang ubang mga lungsod nga nakasinati og grabing kadaot sa kahumayan ug kamaisan mao ang mga lungsod sa Consolacion, Catmon, Malabuyoc, Asturias.
Lakip usab ang Sibonga, Borbon, San Fernando, Pinamungajan, Medellin, Minglanilla, Tuburan, Alegria, Alcantara, Argao, Moalboal, Carmen, Badian, Barili, Santa Fe ug Samboan.
Samtang apil ang mga umahan sa mga dakbayan sa Naga, Toledo, Bogo ug Danao sa naapektahan sa huwaw. Matud pa ni Vicoy nga duna nay kamandoan si Gob. Gwendolyn Garcia sa pagsusi sa mga lugar nga naapektahan aron makapadala og tabang. –BANAT NEWS