CEBU, Philippines - Nalandig sa tambalanan ang usa ka production worker sa usa ka dakong kompaniya og soft drink human pusila sa iyang silingan sa miaging udto diha sa sitio Dona Pepang Cemetery sa barangay Tejero ning siyudad.
Ang biktima giila sa mga imbestigador sa Homicide Section sa Cebu City Police Office mao si Joel Coronado, 44, samtang ang gitumbok nga suspetsado mao ra sab iyang silingang si Wilmer Brigoli alias “Takdol.”Si Brigoli giingong maoy tigpanaod og illegal nga linya sa kuryente sa mga silingan sa biktima.
Sa pasiunang imbestigasyon ni PO3 Geoffrey Gutual, PO2 Leroy Baguio ug PO2 Lou Pagara nagbutyag nga naglakaw ang biktima paingon sa balay sa iyang inahan ug nasugatan ang suspek.
Giingong armado kini og wala matinong kalibre sa armas ug sa walay daghang pangutana gipusil si Coronado makaduha ka higayon hinungdan sa pagkaigo niini sa walang bukton ug walang bahin sa iyang lawas ug daling gidala sa iyang igsuong si Roy ngadto sa Perpetual Soccour Hospital.
Si Brigoli wala na maabti sa mga mirespondeng kapolisan.
Ang biktima mitug-an sa kapolisan nga niadtong Domingo sa alas-9 sa buntag iyang gibadlong ang suspetsado sa pagpanaod niini og illegal nga linya sa kuryente ug ipaputol ang nataod na niini human makit-ing may pipila niini ang makit-ang mag-aso.
Apan gibaliwala lang sa suspek ang gipanulti sa biktima hangtud nga nagkalalis silang duha. –BANAT NEWS