Giagtang pagpusil

CEBU, Philippines - Patay nang nakit-an ug nalungag ang agtang agi sa samad pinusilan ug nagbuy-od na sa karsada ang habal-habal drayber nga gikatahong political supporter ni Dumanjug mayor-elect Nelson Garcia diha sa barangay Lawaan niadtong Lunes sa alas 6:15 sa gabii.

Ang biktima mao si Erwin Isola Rebosquillo, 30, molupyo sa barangay Candabong, samtang wala pa mailhi sa kapolisan ang mamumuno niini.

Subay sa inisyal nga imbestigasyon ni SPO2 Felipe Vivar sa Dumanjug Police nga maoy miresponde sa hitabo, ang magtutudlong si Quirico Sumampong sa Lawaan Elementary School maoy nakadiskubre sa patay’ng lawas sa biktima.

Nagbuy-od na duol sa iyang motor daplin sa barangay road dihang iyaha kining naagi-an paingon sa pagpauli hinungdan nga gi-report niya sa kapulisan.

Matud ni SPO1 Joselito Abella sa Dumanjug Police subay sa gihimong pakisusi nasuta nga dunay samad pinusilan sa agtang ang biktima agi sa wala pa matinong kalibre sa armas.

Gisalikway sa kapulisan ang posibilidad nga tulis ang motibo sa krimen sanglit diha paman ang iyang pitaka nga dunay sulod nga P800 nga iyang kinitaan sa pagpamasahero ug duha ka mga ID ug ang iyang motorsiklo.

Daghang anggulo ang gitutukan sa kapolisan nga posibleng motibo sa krimen sa nagpadayun nilang imbistigasyon ug usa na niini ang posibilidad nga selos sanglit nakit-an man ang biktima sa wala pa ang hitabo nga nagkarga og babaye. Samtang gikompirmar ni Garcia atol sa interbyu sa sibyaanan DyDD nga iyahang political supporter ang biktima apan nagdumili una kini pagtumbok sa posibling mga suspek tungod kay paabuton pa niya ang resulta sa imbestigasyon sa kapulisan.

Apan wala niya isalikway nga may kalambigitan niini ang politika tungod usab sa mga nagsunod nga panghitabo pagkahuman sa eleksiyon dihang naproklamar na siyang mananaog aron dauton ang iyang pagkatawo.

Nanganti si Garcia nga tutukan niya ang pagsulbad sa tanang nahitabong krimen sa ilang lungsod atol unya sa iyang pag-asumir sugod karung petsa 30 sa Hunyo.

Nasayran nga ang kaatbang ni Garcia nga iyang gipildi pagkamayor sa milabay’ng eleksyon mao si Konsehal Gontrano ‘Gon-gon’ Gica samtang ang midaog nga bise mayor mao ang running mate ni Gica nga anak ni outgoing mayor Cesar Baricuatro nga si Cris Dong Baricuatro. –BANAT NEWS