Tomas uyon sa SEZ basta way labot ang siyudad

CEBU, Philippines - Si Cebu City mayor ug congressman-elect Tomas Osmeña mibutyag nga dili siya mobabag sa giplano ni 1st district congressman-elect Eduardo Gullas nga mahimong economic zone ang tibuok lalawigan sa Sugbu basta walay labot ang siyudad.

Gipasabot sa mayor nga ang hinungdan sa iyang pag-usab sa iyang nahaunang desisyon mao ang dakong kahigayunang mapalpak gyud ang maong lakang.

“Kun ganahan sila nga himuong economic zone ang tibuok probinsiya mopalpak gyud na, sigurado gyud ko 100 porsiyento. Anyway dili ko mosugot nga maapil ang siyudad,” sigon pa sa mayor sa interbyu sa DyRF.

Matud pa niini nga ang katuyuan sa maong lakang nga gipasiugdahan sa tanang mga kongresista sa lalawigan sa Sugbu idumala unya sa mga bentahosong mga negosyante.

Iyang gitataw nga sa higayon nga mapaubos ang lalawigan sa economic zone, adunay tukorong board ug dili ang mga mayor maoy molangkob niini kay kadaghanan mga negosyante.

Mga negosyanteng sumala pa sa mayor nga dili gustong mobayad og buhis.

“Unya ang mga negosyante usa ra ang ilang tuyo, dili sila ganahan nga mobayad og buhis. Ug dili sila ganahan nga mobayad og buhis maalkanse gyud ang national, alkanse ang lokal, alkanse ang mga tawo,” matud pa sa mayor.

Nagduda usab ang mayor nga si Gob.Gwendolyn Garcia nagtinguhang maapil ang siyudad sa Sugbu sa special economic zone aron “mo-take over sa siyudad ang gobernadora.”

Giesplikar sa mayor nga dali ra unya ang paghimo niini pinaagi sa pagpanday og balaod sa kongreso.

Si Gullas sa nahaunang report nagkanayon nga dako og kahigayunang mapalambo pa ang Sugbu kun kini madeklarar nga SEZ apan giangkon niining maapektahan gyud niini ang Department of Finance gumikan kay dili na sila makakolekta og buhis sa mga negosyante. (BANATNEWS)