CEBU, Philippines - Kasong grave misconduct ang labing bug-at nga kasong ikapasaka nga maoy labing bug-at nga silot nga pagkatangtang sa serbisyo sa Philippine National Police (PNP) ang atubangon sa hepe sa Samboan Police station nga si Insp. Audie Pelayo.
Si Pelayo gipasanginlang hubog ug nakigsinukmagay sa iya ra usab sakop nga si PO2 Oscar Perater niadtong Sabado sa sitio Kalin-ay sa barangay Poblacion sa maong lungsod atol sa tigbakayan.
Si Insp. Ruben Cuizon, hepe sa Provincial Investigation and Detective Management Branch (PIDMB) sa Cebu Provincial Police Office (CPPO) kinsa maoy gitahasan sa pag-imbestigar ni Sr. Supt. Erson Digal mibutyag nga mihimakak si Pelayo nga diha siya sa tigbakayan. Matud ni Cuizon nga bugtong giangkon ni Pelayo nga nakainom kini niadtong higayona apan dili siya hubog ug wala say kamatuoran ang pasangil nga nagsukmagay silang duha ni PO2 Perater. Sumala pa sa hepe kaniya nga igo lang niya gitandog ang bukton ni Perater isip pangumusta sa gisugo niining gipa-surveillance nga tigpayuhot og ginadiling drogas.
Apan bisan paman niini, giklaro ni Cuizon nga dili sila mo-focus sa sinukmagay kundili ang alegasyong naabot si Pelayo ug Perater sa tigbakayan.
Ubos sa memorandum, circular sa PNP gidid-an ang opisyal ug ordinaryong polis pagsulod sa cockpit arena.
Si Cuizon miingon duna siya’y nakahinabing lima ka saksi ug pulos mikompirmar nga duna lay gamay’ng lalis sa mga sugarol nga nahitabo dihang naabot ang ginganlan og Carungay, pagkataod-taud naabot si Pelayo ug maoy mipakalma sa lalis.
Karung adlawa ipatawag ni Cuizon ang upat ka off duty nga polis sa Samboan aron kuhaan og affidavit. Sa grave misconduct nga administratibang kaso, matud ni Cuizon nga ang labing menus nga silot mao ang 60 ngadto sa 180 days nga suspension ug demotion sa ranggo. (BANATNEWS)