DepEd ug BFP nangandam na

CEBU, Philippines  - Ang Department of Education (DepEd) ug Bureau of Fire Protection  nangandam na alang sa pagbukas sa klase sa sunod buwan  pinaagi sa pagpasiugda og mga kalihokan nga gitumong alang sa kaayohan sa mga kabataang motungha.

Ang DepEd pinaagi kang Regional Director Ricaredo Borgonia miingon nga lakip sa ilang pangandam mao ang pagpaayo sa mga nangaguba nga mga lingkoranan sa matag lawak saringan pinaagi sa Brigada Eskwela nga ilang gipahigayon.

Dugang pa niya nga ang Brigada Eskwela nga ilang gipasiugdahan gihimo pinaagi sa pagtinabangay sa mga ginikanan o sa Parent Teacher and Community Association (PTCA) sa matag tulunghaan.

Samtang si Fire Senior Inspector Rogelio Bongabong nagkanayon usab nga ang ilang gihimo nga pagpangandam sa pagbukas sa klase mao ang pagsil-ing sa mga tulunghaan sa kabarangayan.

Kini aron pagsuta sa mga fire exit sa matag tulunghaan alang sa kasigurohan sa kinabuhi sa mga tinun-an sa panahon nga may sunog. Sa samang higayong tudloan usab nila ang matag magtutudlo sa angay nilang buhaton sa higayong may mahitabong sunog sa eskuylahan.  – BANAT NEWS