Gwen di makalimot sa Talisay

CEBU, Philippines - Bisan og napildi sa unang distrito sa probinsiya lakip na niini ang dakbayan sa Talisay si Gobernador Gwendolyn Garcia sa milabay’ng eleksiyon, ang kagamhanan sa Talisay malaumon nga ang gobernadora mohatag gihapon og tabang sa mga proyekto sa dakbayan.

Si Talisay City Administrator ug campaign manager sa partido sa administrasyon nga Nacionalista Party sa milabay’ng eleksiyon, Richel Bacaltos sa pakighinabi niini sa Banat News kagahapon nagkanayon nga naglaom sila nga ang gobernadora mohatag gihapon og mga proyekto sa siyudad ug mamati gihapon sa ilang mga yango-ngo.

Gipasabot niini nga ang nahitabong pagkapildi ni Garcia sa Talisay ug sa ubang kalungsoran ug dakbayan sa unang distrito usa ka “people’s decision” o pagbuot sa katawhan. Matud ni Bacaltos nga matag pangampaniya sa grupo sa administrasyon niadtong milabay’ng eleksiyon gidala gyud nila si Garcia ug ang running-mate niini nga si Glen Soco ug gani giapil usab nila sa ilang mga sample ballot ang duha.

Dili ikalimod nga ang gobernadora kanunay’ng mitabang sa Talisay ug gani gihimo pa siyang adopted daughter sa konseho sa siyudad.

Apan adunay mga kabalaka nga mitumaw nga posibleng ang gobernadora mangluod tungod sa iyang pagkapildi sa unang distrito sa probinsiya.

Sa laing bahin, ang mga napiling mamunoan karon sa Talisay aduna nay gikatakdang executive ug legislative agenda alang sa umaabot nga kaugmaon sa siyudad sulod sa tulo ka tuig.

Matud ni Bacaltos nga estudyohan nila karon ang mga agenda sa milabay’ng pamunoan aron masuta kung unsay wala pa matiwas o nakuwang sa mga proyekto. Ang grupo sa administrasyon sa siyudad maoy mayorya nga napili sa milabay’ng eleksiyon apan adunay duha kanila ang mga bag-o sa grupo nga nasagol nga sila si councilor-elect Choy Aznar, Val Ylanan ug Celiapo Cabuenas.

Sa oposisyon, si Danilo Caballero ug Romeo Villarante lang ang napili sa pagka-konsehal sa siyudad. – BANAT NEWS