CEBU, Philippines - Saulogon sa Artsidyosesis sa Sugbo ang Bodas de Plata kon Silver Anniversary ni Cebu Archbishop Ricardo Cardinal Vidal nga tambungan sa mga kadagkuan sa Simbahang Katoliko sa nasud ugma, adlaw’ng Martes Mayo 25. Ang selebrasyon gipahibalo sa tibuok artsidiyosesi sa Sugbu sa tanang Santos nga Misa kagahapon aron pag-imbitar sa tumutuo sa pagtambong sa kalihukan diha sa Metropolitan Cathedral.
Ang selebrasyon pahinungod kini sa ika-25 ka tuig nga pagkatuboy kang Vidal sa pagkahimong Cardinal dihang iyang gidawat ang pula nga kawo nga simbolo sa pagka-Cardinal sa usa ka pari didto sa Vatican sa Roma.
Karong adlawa adunay ipahigayong Solemn Vespers diha sa Cebu Metropolitcan Cathedral alas-6 sa gabii nga gipaabot nga tambungan sa gatusang kaparian sa artsidyosesis ingon man sa mga bisita gikan sa ubang dapit.
Human niini mao ang cultural show ug ang panihapon sa mga bisita diha gihapon sa maong simbahan.
Samtang gipaabot nga motambong sa selebrasyon sa Pontifical Mass sa adlaw’ng Martes alas-10 sa buntag mao sila si Manila Archbishop Gaudencio Cardinal Rosales ug ni Apostolic Nuncio sa Pilipinas nga si Arsobispo Edward Joseph Adams. Si Rosales maoy gikatakdang mohatag sa homily atol sa Thanksgiving Mass nga gipaabot nga tambongan usab sa tanang imbitadong kaobispohan sa tibuok nasud sumala pa sa gipatik sa basahon sa simbahan nga Ang Bag-ong Lungsoranon.
Sa edad nga 54 anyos, nadawat ni Vidal ang pulang kawo nga nagsimbolo sa iyang pagka-Cardinal gikan mismo ni anhing Santo Papa Juan Pablo III atol gitawag nga consistory.
Ang consistory mao ang pagtapok sa College of Cardinals uban sa Santo Papa ug lakip sa gihisgutan ang pagtudlo og bag-ong cardinal ug niadtong tungura si Vidal maoy nahimong ikaupat nga Pilipinong nakabaton og susamang dungog.
Atol sa maong consistory 28 ka Obispo ang natudlong cardinal apan bugtong si Vidal na lamang maoy nahabiling nagpadayon sa iyang pastoral ministry tungod kay ang uban mitaliwan na ug ang uban miretiro. Sumala pa sa Ang Bag-ong Lungsoranon, si Vidal misuwat na og resignation letter ngadto sa Vatican niadtong 2006 tungod kay nag-edad na kini og 75-anyos apan gilugwayan pa kini ni Santo Papa Benedicto XVI.
Nalakip si Vidal sa College of Cardinals nga nag-eleksyon aron pagtudlo og bag-ong Santo Papa human motaliwan si Santo Papa Juan Pablo II niadtong gihimo ang conclave sa Sistene Chapel sa Vatican sa Roma niadtong 2005 nga diin natudlo ang kasamtangang Santo Papa karon sa Simbahang Romano Katoliko sa kalibutan.
Ilusad usab sa adlaw’ng Martes ang librong Biography ni Vidal ug ang film showing sa kinabuhi niini. – BANAT NEWS