Cortes nakig-uli na's mga Ouano

CEBU, Philippines - Gitataw sa napili pagbalik sa makaduhang termino pagkamayor sa siyudad sa Mandaue Mayor Jonas Cortes nga nagkauli na ang ilang maayong kabubut-ong ngadto sa mga Ouano.

Kini sa gipakitang pagginaksanay ni Cortes ug sa patriarka sa mga Ouano nga si kanhi mayor Alfredo ‘Pedong’ Ouano niadtong nakalabay nga adlaw sa usa ka kalihukan sa siyudad sa Mandaue sa city hall.

Matud pa ni Ouano sa interbyu sa Banat Sugbu programa sa DyRF nga iya lamang gipakita ngadto sa katawhan sa Mandaue nga lumalabay lamang ang politika ug andam siyang makighigala sa mga nakaatbang sa politika human sa election.

Nasayran nga si Cortes maoy nakapukan sa apo ni Ouano nga si Thadeo Jovito ‘Jonkie’ Ouano sa election niadtong tuig 2007 sa pagkamayor sa Mandaue City.

Si Cortes nagkanayon nga ang iyang paghangop kang Ouano pagpakita lamang usab niya sa iyang taas nga respeto sa tinamod kaayong politiko ug kanhi mayor sa siyudad.

Apan mikatawa lamang ang mayor dihang gipangutana kun bukas pa gihapon siya nga makig-uli ni 6th district congresswoman Nerissa Soon- Ruiz ang iyang kaatbang sa politika ug napildi sa bag-ohay lamang nahuman nga election sa Mayo 10.

Matud pa sa mayor nga wala siya magdumot kang Ruiz bisan pa man atol sa kampanya grabe kining nakapanaway ug mibatikos kaniya.

Matud pa ni Cortes nga ang iyang tinguha karon nga dili mapasagdan ang mga Mandauehanon apil na ang ilang naparot nga kontra partido kay ang iyang tinguha nga maghiusa pagbalik ang mga political leaders sa siyudad alang sa tul-id ug tinuoray nga serbisyo ug kalambuan sa siyudad nga gialagaran.  – BANAT NEWS