Magtutudlo gidid-an sa pagpangolekta'g bayad

CEBU, Philippines - Higpit nga gipahimangnoan pag-usab ang mga magtutudlo sa tanang tulunghaang publiko sa dakbayan sa Mandaue sa dili pagpangolekta og bayad gikan sa mga estudyante nga magpa-enroll karong umaabot nga pagbukas sa klase.

Si Benjamin Tiongson sa division office sa Department of Education (DepEd) sa maong dakbayan maoy mihimo sa maong pahimangno nunot usab sa nagpadayon nga enrollment sa kabataan nga motungha karong tuiga.

Dugang pa ni Tiongson nga mosuroy siya sa tanang tulunghaang publiko sa kabarangayan sa dakbayan aron ipadangat sa maong mga pahimangno.

Si Tiongson miawhag sa mga ginikanan sa pagtaho gilayon ngadto sa ilang buhatan kun adunay magtutudlo nga dili modawat sa magpa-enroll nilang anak.

Nunot sa pagbukas sa klase karong sunod bulan, ang Department of Trade and Industry (DTI) mipasalig usab ngadto sa mga ginikanan nga mopatungha sa ilang anak nga dili sila makasinati og umento sa presyo sa mga galamiton sa pag-eskuyla sama sa notebook, lapis, ballpen, papel ug uban pa.

Si Trade Undersecretary Zenaida Maglaya sa iyang pamahayag miingon nga ang mga pabrika sa notebook ug uban pa nga mga galamiton sa kabataan dili mopausbaw sa ilang produkto karong tuiga.

Si Maglaya miingon nga sa pagbukas sa klase ilang gipaniguro nga ang kubos nga presyo sa mga galamiton sa tulunghaan maoy ikapatuman.  (BANATNEWS)