SHABU 'SAKMIT
CEBU, Philippines - Nasikop ang usa ka lalaking naghupot og ginadiling drogas atol sa gipahigayong operasyon sa Investigation and Detective Management Branch pasado alas-11 sa miaging gabii sa Warmick-Barracks barangay Ermita.
Ang nasikop mao si Jermene Pateres, 25, molupyo sa maong lugar human makuhai og usa ka dakong plastic sa gituohang shabu.
Ang buhatan sa IDMB mi-serve unta og warrant of arrest sa usa ka wanted person nga adunay kasong robbery sa maong lugar apan wala kini sa ilang balay.
Apan sa dihang manguli na ang kapolisan nabantayan ni PO1 Esmertaldo Quillosa nga dunay tulo ka lalaki sa eskina sa maong lugar nga kadudahan kaayo og lihok hinungdan nga nagpaka-aron ingnon si PO1 Quillosa nga moagi lang sa maong lugar.
Diha-diha nakit-an ni Quillosa ang usa sa tulo ka lalaki nga may gikuptang dakong plastic nga sa iyang pagtuo shabu, dihang mipaduol ang mga kaubanan ni Quillosa daling mikaratel og dagan ang duha ka lalaki ug bugtong si Pateres ray nakuptan.
Nakuha gikan ni Pateres ang maong dakong pakete sa gituohang shabu nga gidudahang mokantidad og P30 mil. (BANATNEWS)
- Latest
- Trending
