Billboards 'panaway' sa srp di tangtangon

CEBU, Philippines - Wala’y plano ipatangtang ni congressman-elect, Mayor Tomas Osmeña ang mga kontrobersyal nga billboards nga nahimutang nga South Road Properties (SRP).

Si Osmeña nagkanayon nga dili angay ikabalaka sa kampo nilang Gobernador Gwendolyn Garcia ang maong billboard.

“Well, di na nako ipatangtang kay dili man na siya anti, it’s a statement of fact,” matud pa sa mayor.

“The City of Cebu is so bright, dili parehas sa province ngitngit kaayo,” dugang pa niini.

“I like it very much and many people liked it too,” saysay pa niini.

Apan si Capitol Consultant on Information Atty. Rory Jon Sepulveda mibutyag nga pulos mga pasangil ang anaa sa maong mga billboard.

Matud niini nga adunay gilapas nga balaod ang mayor sanglit nga gipanag-iya sa gobiyerno ang SRP ug dili angay gamiton aron makapangdaot sa away batok sa politika.

“It’s an unlawful election propaganda, and also a violation of law kay gigamit niya ang government property,” matud pa niini.

Dugang usab ni Sepulveda nga gustong aksyonan sa gobernador ang maong pagpatangtang tungod kay ‘binata’ ra kaayo ang iyang mga gipangbuhat.

Sa laing bahin, subling gihagit ni Osmeña og recall ang padayon nga pagkwestyon sa kampo ni Garcia sa resulta sa miaging eleksyon.

“Let’s do an election all over again para ma minusminusan na nang mga questions. She has no enough money for reelection, and pustaanay nga mapilde gyud na siya,” matud pa niini.

Gitubag hinuon sa kampo ni Garcia pinaagi ni Sepulveda ang maong pasangil nga wala na sila mag-apas og laing eleksiyon, pasangil ra daw na ni Osmeña aron madaot ang gobernador.

Gibutyag hinuon ni Sepulveda nga pulos pang bata ang mga pasangil sa mayor.    (BANATNEWS)