CEBU, Philippines - Patay nang nadangat sa tambalanan ang 23-anyos nga ulitawo human kini pusila sa iyang suwang ug liog samtang nagtan-aw og kalingawan nunot sa nagsingabot nga kapistahan sa sitio Kamagayan barangay Perrelos siyudad sa Carcar niadtong Biyernes sa alas 10:40 sa gabii.
Ang biktima mao si Junnel Agbo, 23, molupyo sa Upper Tawog barangay Valladolid Carcar samtang ang responsable sa krimen wala pa matumbok sa kapulisan sa paghimo ning balita.
Matud pa ni PO1 Gilmer Noval sa Carcar City Police dihang nahinabi sa Banat News, ang biktima misuroy aron unta motan-aw sa maong lugar sa gipahigayong dance contest.
Apan kalit lang kining gisekreto og duol sa mamumuno dayong pusil makadaghang higayon diha sa suwang ubos nga bahin sa aping ug ang bala milapos diha sa luyong bahin sa liog.
Ang mga mirespondeng polis mihatud sa biktima diha sa Carcar District Hospital apan gideklarar kini sa mga doctor nga dead on arrival.
Ang kapulisan naka-recover og tulo ka kabhang sa bala sa kalibre 9mm ug usa ka slug nga gituohang gikan sa armas nga gigamit sa mamumuno. (BANATNEWS)