Kawani sa LTO-Mandaue gikulata sud opisina

CEBU, Philippines - Usa ka empleyado sa Land Transportation Office-7 sa Mandaue ang gikulata sa iyang higala sulod sa iyang buhatan sa milabay’ng hapon.

 Ang gilkulata mao si Jona Calero, 39, residente sa barangay Pardo dakbayan sa Sugbu ug empleyado sa LTO Mandaue.

 Samtang ang mikulata kaniya mao si Sammy Flores, 37, residente sa sitio San Miguel barangay Lorega dakbayan sa Sugbu ug higala sa biktima.

 Matud pa ni Calero mga alas 2:30 sa milabay’ng hapon samtang busy kini sa iyang trabaho kalit nga misulod sa iyang opisina si Flores dayong pangulata kaniya.

Gimakmak og maayo ni Flores ang tiyan ni Calero hinungdan sa iyang bun-og nga nahiaguman ug pagkalandig sa tambalanan.

Ang mga guwardiya sa maong buhatan mao nay midakop kang Flores ug giduso kini ngadto sa Station 5 sa Mandaue City Police Office.

 Sa maong insidente kasamtangang nabalda ang transaksiyon sa maong buhatan gumikan sa maong insidente ug kaguliyang sa opisina ni Calero.

 Atol sa imbestigasyon nasuta nga gumikan sa utang maoy usa sa hinungdan sa maong insidente.

 Ang duha gibuhian sa kapolisan ug subling magtagbo sa Station 5 alang sa ilang posibleng “settlement” nga pagahimuon kalabot sa utang ni Calero ngadto ni Flores.  (BANATNEWS)