Reklamo sa basura tubagon

CEBU, Philippines - Hingpit nga tubagon sa mga opisyal sa Philippine Export Processing Zone (PEZA) ang mga reklamo bahin sa basura nga nahimutang duol sa tunghaang elementarya sa barangay Ibo, dakbayan sa Lapulapu inigbalik na sa ilang administrador nga kasamtangang atua pa sa Manila.

Si Ann Romo nga sekretarya sa PEZA mibutyag sa Banat News kagahapon nga ang ilang administrador nga si Sansaluna Pinagayao mao ray bugtong makatubag sa maong reklamo.

Mireklamo ang mga molupyo sa barangay Ibo ngadto sa kagamhanan sa dakbayan sa Lapulapu tungod sa dili na maantus nga kabaho sa naglaundok nga basura sa nahisgotang dapit.

Si Teodulo Ybanez nga maoy city administrator sa maong dakbayan mipasabot nga dako ang ilang tinguha sa pagtubag sa   maong reklamo apan ang nakaparat kay walay katungod ang kagamhanan sa maong dakbayan sa pagpanginlabot niini.

Gipasabot niya nga ubos kini sa hurisdIksiyon sa PEZA ug may gilatid nga lagda nga nagsalikway sa ilang kaakohan sa pagpanghilabot sa mga basura sa maong lugar.

Ang kabaho sa basura sa Ibo nasinatian sa mga molupyo dihang giablihan pagbalik ang Marina Mall nga gipanag-iya sa negosyanteng si Efrain Pelaez. – BANAT NEWS