Babaye gihapsa'g bato sa nagselos nga ex-BF

CEBU, Philippines - Nahagbong gikan sa iyang giangkasang motorsiklo ug naluko diha sa karsada ang usa ka 29-anyos nga babaye human kini hapaka og bato diha sa iyang nawong sa kanhi niya uyab kagahapon sa buntag diha sa barangay Poblacion, dakbayan sa Talisay.

Ang biktima mao si Carmele Briones, dalaga, residente sa compound sa Tourist Seaside Hotel sa barangay Poblacion ug anak ni Nimfa Briones, budget officer sa Cebu City Hall.

Ang suspetsado kinsa daling miikyas mao si Christian Alpe, 27, taga dalan Tres Aliños sa nahisgutang barangay.

Si SPO1 Oliver Dacua, duty desk officer sa Talisay City Police Station nga nahinabi sa Banat News nagkanayon nga miangkas si Briones sa motorsiklo sa iyang uyab karon nga si Carlos Pogoy nga amigo ra usab ni Alpe.

Apan sa paglabay diha sa maong lugar kalit nga mibabag si Alpe dayong hapos sa nawong ni Briones, gumikan sa kakusog sa pagkaigo nahagbong sa motor ang dalaga ug nalimbuwad usab ang motor.

Dihang usban pa unta ni Alpe og dakdak si Briones sa gikuptang bato gilayog kini ni Pogoy apan nakaipsot una pa makaabot ang mga polis.

Si Alpe ug Briones giingong dugay nang nagbuwag apan nagduda ang mga kabanay sa suspek nga hangtud karon wala pa gihapon kini makadawat ug nagselos.  – BANAT NEWS