Trailer sa Kapitolyo diha sa Fuente giguroy sa Citom

CEBU, Philippines - Ang Kapitolyo sa probinsya sa Sugbo mopasaka og reklamo batok sa City Traffic Operations Management (CITOM) kalabot sa pagguyod sa trailer truck nga gipanag-iya sa Kapitolyo nga gi-parking sa miaging adlaw sa luna diha sa kanhi “larsian’ sa Fuente Osmeña Rotonda.

Ang Capitol consultant on information nga Rory Jon Sepulveda nagkanayon nga illegal ang gihimo sa CITOM tungod kay naa kini sa sulod sa luna sa probinsya sa Sugbo.

Matud ni Sepulveda nga ang trailer gigamit nila isip barikada sa mga illegal nga mga tawong mookupar sa maong lugar sukad pa sa miaging tuig human si Gobernador Garcia mimando nga ang tanang mga luna nga gipanag iya sa provincial government sulod sa dakbayan bantayan.

“Nahibulong nalang kita nga sa kadugay sa panahon nga kini giparada sa luna nga iya sa probinsya, kalit lang kini nga gikuha sa Citom,” matud pa ni Sepulveda.

Gihimakak hinuon sa executive officer sa CITOM, Arnel Tancinco nga may nagsugo kanila, kundili, ilaha kining gikuha gumikan kay gibutang man kini sa “no stopping area” sa maong lugar.

Dugang pa niini, walay plate number ang maong trailer nga kalapasan sa provision sa R.A 4136.

Apan si congressman-elect, ug outgoing Cebu City Mayor Tomas Osmeña mibutyag nga wala’y pili ang balaod nga gi-implementar sa matag dakbayan bisan pa man kun ikaw dako og posisyon.

“There are rules and let them follow Cebu City rules. I don’t care who owns the property, but they have to follow the rules even if you’re from Malacañang,” matud pa sa mayor. Ang maong trailer anaa karon gibutang sa North Reclamation Area ug mahimo lang kining makuha kun makahatag ang Kapitolyo og proof of ownership ug present registration.  – BANAT NEWS