Negosyante gibunalan og kahoy may lansang tipi

CEBU, Philippines - Patay ang usa ka negosyante og utanon human gibunal-bunalan og kahoy nga may lansang sa tumoy alas-3 pasado ang takna sa miaging kaadlawon sa sitio Barlap, barangay Banilad, dakbayan sa Mandaue.

Ang biktima mao si Maximo Manatad Jr., 50, nagpuyo sa nahisgutang dapit ug ang nagbunal nailhan na sa kapolisan apan gipugngan lamang ang pangalan sanglit padayon pa ang ilang hot pursuit operation.

Si PO3 Roberto Neri sa Investigation Detection and Management Bureau (IDMB) nga nahinabi sa Banat News miingon nga paingon sa Carbon sa dakbayan sa Sugbo ang biktima aron mangompra.

Apan samtang nagguyod ang biktima sa iyang motorsiklo sa tuyo nga dili makatugaw sa nangatulog nilang silingan kalit nga mibutho ang suspetsado nga nagbitbit og kahoy.

Sa kalit lang gibunal-bunalan niini ang biktima sa ulo, bukton ug kalawasan sa kahoy nga aduna diay lansang sa tumoy. Ang biktima nakahimo pa og sagang sa maong kahoy apan gumikan sa kadaghan sa igo niini sa lansang nalup-og kini.

Ang suspetsado daling nakasibat pahilayo sa maong dapit ug ang mga silingan nga nakamatikod sa maong hitabo daling nanguryoso ug mao nay midala sa biktima sa Mandaue City District Hospital apan gideklarar kini sa mga doktor nga dead on arrival.

Matud pa ni PO3 Neri nga ilang gisalikway ang tulis nga motibo sanglit wala man kuhaa ang cellphone ug salapi nga gisulod sa bulsa sa biktima.

Blangko pa ang kapolisan kun unsay motibo sa maong krimen samtang padayon pa ang ilang hot pursuit operation sa gikatahapan.  – BANAT NEWS