CEBU, Philippines - Naglaraw ang kagamhanan sa siyudad sa Sugbu nga palawman ang bukana sa Guadalupe River aron dili na mahitabo ang pag-awas sa tubig baha atol na sa panahon sa ting-ulan.
Si Cebu City Mayor Tomas Osmeña uyon sa gitinguha ni konsehal Gerardo Carillo nga mapalawman ang sapa sa Guadalupe isip solusyon nga malikay sa peligro ang mga kabalayan sa duol niini.
Ang mayor miuyon sa gipangayong P9 milyones nga pundong gamiton sa maong proyekto.
Ang maong plano maoy usa sa preparasyon sa Cebu City Disaster Coordinating Council nga gipangulohan ni Carillo sa pag-abot sa panahon sa ting-ulan diin sagad sa problema sa siyudad mao ang tubig baha ilabi na sa sapa sa Guadalupe nga maoy nagbuwag sa South ug North districts.
Naa usab mahimutang ang liboang kabalayan diha sa daplin sa maong sapa ug maoy nag-unang naa sa peligro kun motaas og maayo ang tubig.
Matud pa ni Carillo nga ang maong gahin adto kuhaon gikan sa calamity fund sa siyudad alang niining tuiga.
Si Carillo nagkanayon nga moabot sa usa ka metro ang gilawmon nga ilang kubkubon sa Guadalupe River ug moabot sa kapin sa usa ka kilometro gikan sa baybayon paingon sa naasoy nga sapa. – BANAT NEWS