CEBU, Philippines - Ang tigpamaba sa Kapitolyo nga si Atty. Rory Jon Sepulveda mibutyag nga tinud-on gyud sa One Cebu Party ang pagkwestiyon sa resulta sa election dinhi sa Sugbu gamit ang mga Precinct Count Optical Scan machine tungod sa kadaghan sa mga reklamo sa ilang mga tawo gikan sa field labot sa giingong kapalpakan.
Kini ilabina nga nanggawas ang balita sa kaulohan nga may nahitabong electronic nga pagpanikas pabor ngadto sa usa ka kandidato sa pagkapresidente.
Matud pa ni Sepulveda nga ang ilang partido seryoso sa ilang pagtuon karon alang sa pagduso og election protest ngadto sa Provincial Comelec Office ug kagahapong adlawa gihatud na nila ang ilang sulat hangyo ngadto sa buhatan ni Provincial Election Supervisor Atty. Lionel Marco Castillano.
Gihangyo nilang ihatag sa ilang partido ang updated date sa total number sa mga barangay sa probinsiya, gidaghanon sa clustered precincts, registered voters, ug voting centers.
Laing gipangayo niini mao ang certified true copy sa Certificate of Candidacy nila ni One Cebu vice gubernatorial candidate Glenn Soco ug sa kaatbang nga si Vice Gov. Gregorio Sanchez ug ingon man ang certificate of canvass sa Provincial Board of Canvassers.
Subling gitataw ni Sepulveda nga nakadawat sila og report nga may pagpanikas nga nahitabo gamit ang Precinct Count Optical Scan kon PCOS machine sa May 10, 2010 automated election ug ang pipila niini ilaha nang nadokumento. – BANAT NEWS