BEI sa North, South ug Lapu' nakadawat na sa ilang honorariums, 30 towns wa pa

CEBU, Philippines - Gipanghatag na sa Commission on Election ang mga honorarium sa mga magtutudlong nagsilbing Board of Election Inspector kon BEI sa bag-ohay lamang nga nahuman nga automated election niadtong Mayo 10.

Ang buhatan ni Provincial Election Supervisor Atty. Lionel Marco Castillano mitug-an sa Banat News nga nahatag na sa ilang buhatan ang 4 mil pesos nga honorarium sa mga BEI.

Apan gitumbok niining may dul-an sa 30 pa ka mga munisipalidad ug siyudad nga wala pa mahatagi sa maong benipisyo tungod kay napakyas kini sa pagsumiter sa buhatan ni Castillano sa liquidation sa cash advance nga P2 mil nga nahatag sa Comelec ngadto sa mga magtutudlo sa wala pa ang election.

Gipahibawo usab niining ang 1,500 ka pesos nga honorarium sa mga magtutudlo nga nagsilbing support staff sa mga BEI hayan sa sunod semana pa madawat sanglit wala ma-release sa COMELEC Manila.

Si Lapulapu City Elections officer Ferdinand Gujilde mipadayag nga naapod na nila sa mga magtutudlo sa barangay Pusok, Basak, Pajo ug Poblacion.

Samtang sa Cebu City south district, 900 ka mga magtutudlong BEI chairmen nakadawat na og tag P4,300 nga honorarium apan pipila kanila nga nakahinabi sa Banat News mireklamong kuwang pa kini gumikan sa kataas sa mga oras sa ilang pagbantay.

Gipahibawo usab ni Omar Shariff Mamalinta, ang assistant election officer sa north district nga gawas sa honorarium aduna pay dugang P2,500 alang sa BEI chairmen ug poll clerks nga nakaapil sa seminar nga naghimo kanilang IT capable technicians. – BANAT NEWS