CEBU, Philippines - Ang Commission on Elections-Manila mibutyag kagahapon nga wala’y klaro ang mga pamahayag sa usa ka nangangkong testigong ginganla’g ‘Robin’ kabahin sa mga anomaliya ug pagpanikas sa miaging Mayo 10 automated polls.
Matud ni Comelec spokesman James Jimenez, nga layo ra sa tinuod ang gipangangkon ni ‘Robin’ nga aduna’y ginama na daang mga resulta nga gibutang ngadto sa Comelec server nga pareho sa mga Precinct Count Optical Scan (PCOS) machines sa wala pa ang aktuwal nga transmisyon ngadto sa mga presinto.
Kahinumduman nga giangkon ni ‘Robin’ nga ang duha nga nag-unang dumadaog sa pagka- bise presidente nga sila si Senador Mar Roxas ug Makati City Mayor Jejomar Binay, mibayad aron sa pagmanipula sa resulta sa eleksyon ug nga si Binay migasto pa gyud og mas dako, nga mao’y hinungdan nga naangkon niini ang kinadak-an nga botos sa parsyal nga tally sa election returns sa tibuok nasud.
“Pinakikita niya na hindi ganun ka comprehensive ang kaalaman niya sa sistema,” matud pa ni Jimenez sa interbyu sa GMA News.TV.
Si Comelec Commissioner Gregorio Larazabal hinuon nagbangutan nga giunsa sa giingong mga operators ang pagkuha og linibo ka mga makina parehas sa PCOS.
Ang poll machine supplier sa Smartmatic Asia Cesar Flores mibutyag nga anaa sa P60,756.31 ang matag PCOS machine. Aduna’y 82,000 ka mga machine ug lain pang 6,000 ka makinang reserba.
Giklaro hinuon sa taga Comelec nga wala pa sila’y igong ebidensya kung kinsa gyud ang mipagawas sa maong tawo. Ila hinuon nga gisiguro nga wala’y kamatuoran ang mga alegasyon nga gipagawas sa maong tawo batok sa miaging piniliay.
Dugang pa niini nga kun aduna man gani sila’y igong pangutana, andam silang manubag niini, samtang mihangyo nga hunungon ang mga walay klarong mga pasangil aron mas hapsay ug wala nay problema. – BANAT NEWS