Pilderong kandidato tipi

CEBU, Philippines - Patay ang usa ka pilderong kandidato sa pagkakonsehal sa lungsod sa Tabogon human kini napusilan sa usa ka traffic enforcer sa City Traffic Office Management nga iyang unang gipusil gumikan sa pagsitar kaniya sa kalapasan sa lagda sa trapiko pasado alas-9 sa miaging gabii sa eskina sa dalan J.C Zamora ug D. Jakosalem sa barangay Pari-an.

Ang namatay mao si Orson “Sonny” Ornopia, 34, kasamtangang nagpuyo sa Lower Hemog Village barangay Tabok syudad sa Mandaue samtang ang nasamdang traffic enforcer mao si Raul Langbid, taga barangay Basak San Nicolas ning dakbayan.

Wala usab maestablisar sa kapolisan kun si kinsa ang kauban ni Langbid atol sa hitabo sanglit wala pa nila ikaestorya ang naulahi diha sa Chong Hua Hospital.

Sa pakighinabi sa Banat News ni PO3 Edario Manatad kini mibutyag nga si Langbid gikan pa sa nasunogan sa barangay Tinago dihang pag-abot sa maong dapit gibabagan sila ni Ornopia nga nagmaneho usab sa puting multicab ug mibuhi og estorya nga “sige lang mo panakop unya labaw pa mo nga mga violators. Tan-awa inyo tail light wa magsiga!”

Tungod niini nagkasumpaki sila si Ornopia ug Langbid ug taliwala sa ilang tinubagay gikatahong mikuha og armas si Ornopia sa iyang multicab ug kalit mipusil sa naulahi diha sa abaga. Bisan samaron gikatahong nakiglayog si Langbid kang Ornopia ug diha-diha kalit nga mipaka ang buto-buto sa armas, si Ornopia nahagba kapin 20 ka metros gikan sa iyang multicab. Aduna kini samad pinusilan sa tiyan ug sa liog.

Samtang ang usa ka kalibre .45 pistola diha mapalgi dili layo sa luyong bahin sa multicab ni Ornopia. Gituohang atol sa panaglayog nailogan kini ug maoy napusilan.

Ang mga imbestigador wala pa maka-establisar kun giunsa pagkahitabo nga napusilan ug kinsay mipusil ni Ornopia ug kun nganong layo ang gikahagbaan niini gikan sa iyang multicab.

Sa pakighinabi usab sa mga tigbalita sa ig-agaw sa biktima nga si PO1 Dennis Ornopia nga nadestino sa Carbon Police Station nakadungog siya og estorya gikan sa mga suod nga higala ni Ornopia nga naglagot kini sa taga Citom kaniadto pa human gikatahong gigisi ang rehistro sa iyang multicab nga iya untang ibaligya.

Sa pakighinabi usab sa Banat News ni Sr. Insp. Michael Anthony Bastes, ang hepe sa Fuente Police Station ug kanhi hepe sa Theft and Robbery Section, mibutyag kining si Ornopia maoy usa sa suspetsado sa pagpangawat sa Grandia Car nga gipanag-iya sa Toyota Motors diha mismo sa ilang showroom sa North Reclamation Area pipila ka bulan na ang nakalabay.

Sa wala pa marekober ang maong sakyanan gikatahong mao kini ang gigamit sa pagpanulis uban sa pipila ka kauban niini.

Midugang usab si Bastes nga si Ornopia usab ang maong lalaking magpatubil unya dili mobayad sa pipila na ka mga gasoline stations sa dakbayan.  – BANAT NEWS