CEBU, Philippines - Mikabat ngadto sa 18 ka mga inahan sa dakbayan sa Sugbu ang namatay sa miaging tuig gumikan lang sa pagpanganak sumala pa ni Estella Ygonia ang HRD Chief sa Cebu City Health Department.
Matud pa ni Ygonia nga usa sa hinungdan mao ang pagpabaya sa ilang panglawas atol sa ilang pagmabdos.
Hinuon matud pa niya nga miubos ang gidaghanon sa mga inahang namatay sa pagpanganak dinhi sa Sugbu karong tuiga kumparar sa nakalabay’ng tuig.
Gumikan niini, padayong gidasig ni Ygonia ang mga mabdos nga magpa- prenatal ug magpa -check up gyud sa mga health centers aron ma-monitor ang ilang panglawas ug sa ilang gisabak.
Si Dr. Hei Tangaan, senior resident OB-Gyne department sa Vicente Sotto Memorial Medical Center nagkanayon nga tulo ngadto sa upat ka inahan ang mamatay matag buwan sulod sa maong tambalanan gumikan lang sa pagpanganak.
Ang VSMMC mopaanak og 400 ka mabdos matag bulan apan tulo ngadto sa upat kanila ang mamatay samtang nanganak. Sagad sa hinungdan, uwahi na mahibaw-ang may hypertension kon high blood nga balatian ang maong mabdos, mag-bleeding ug ma-impeksyon gumikan kay wala sila sukad mobisita og doktor atol sa ilang pagmabdos.
Samtang giangkon ni Tangaan maghuot gihapon ang OB ward sa VSMMC tungod kay aduna lang kini 38 ka bed capacity apan moabot sa 110 ka mga inahan ang manganak matag adlaw, hinungdan nga sa usa ka katre, tulo ang mag-okupar.
Apan aron dili maghuot, kadtong manganak nga normal delivery pagawson dayon sulod sa duha ka adlaw. – BANAT NEWS