Talisay fishport padayonon

CEBU, Philippines - Bisan sa mga pagsupak sa mga apektadong residente sa barangay Tanke ug San Roque, dakbayan sa Talisay napatuman gyud ang usa sa mga multi-million fishport project sa maong barangay.

Si Talisay City Engineer Audie Bacasmas nga nahinabi sa Banat News mibutyag nga niadtong tuig 2007 napatuman ang proyekto ug nakumpleto ang site development niini niadtong Nobiyembre, 2008.

Iyang gibutyag nga mikabat sa sobra sa P50 milyones ang budget sa maong site development.

Sa milabay’ng tuig, gisugdan na usab sa pagtrabaho ang estraktura niini nga gilangkuban sa cold storage ug administration building.

Gipasabot ni Bacasmas nga kun mahuman na ang maong proyekto, ang mga sakayan pangdagat mahimo nang modunggo niini.

Dunay parte sa pikas nga bahin sa maong fishport nga mahimong dunggoan sa mga passenger vessel.

Matud ni Bacasmas nga ang pundo sa maong proyekto gikan sa kagamhanang nasyonal nga gilangkuban sa Department of Transportation and Communication (DOTC), Philippine Fisheries Development Authority (PFDA), Department of Public Works and Highways (DPWH), kagamhanan sa probinsiya ug sa lokal nga kagamhanan sa siyudad.

Si Kongresista Eduardo Gullas maoy naninguha sa pagduol sa maong mga buhatan aron makakuha og budget nga mabubo sa nahisgutang proyekto.

Ubos gihapon sa paninguha sa kongresista, ang Cebu Port Authority (CPA) ug DOTC mobubo og dugang pundo alang sa dunggoanan sa mga pampasaherong barko sa pikas nga bahin sa fishport.

Sa laing bahin, ang laing multi-million project sa siyudad nga market-cum-terminal diha sa barangay Lagtang nga gikatakda untang pormal na nga buksan niadtong Marso 8, 2010 apan tungod kay duna pay parte niini nga wala pa mahuman giuswag ngadto sa buwan sa Oktobre niining tuiga ang pagbukas niini.

Si Konsehal Rodolfo “Rodi” Cabigas kisan maoy kanhi chairman sa committee on Public Works and Infrastructure mipasalig nga mabuksan na gyud karong Oktobre ang market-cum-terminal. – BANAT NEWS