CEBU, Philippines - Duha ka pulis sa dakbayan sa Lapulapu ang mag-atubang og imbestigasyon sa kasong administratiba gumikan sa pag-eskapo sa binilanggo niadtong Domingo nga hangtud ning pagsulat sa balita wala pa madakpi pagbalik.
Gipaubos ni Lapulapu City Police Office Director Sr. Supt. Mariano Natu-el Jr. sa “camp restriction” si PO2 Jude Abella ang jailer sa detention cell sa kapolisan sa Lapulapu human kini naeskapohan ni Joshua Sayson nga nag-atubang og kasong Robbery with Homicide.
Lakip sa imbestigahon si PO2 Dario Arias ang kaubang jailer ni PO2 Abella nga wala motunga sa iyang duty atol sa maong hitabo.
Matod pa ni PO2 Arias nga daan nang gipahibalo niini si PO2 Abella pinaagi sa text message sa cellphone nga dili siya makatunga sa iyang duty.
Hinoon nagpadayon pa karon ang ilang imbestigasyon ug ila kining iduso ngadto sa Investigative Detective Management Division (IDMD) sa PRO-7. Ang IDMD maoy morekomendar unya kun unsang silot ang angayang ipahamtang sa duha ka pulis.
Kahinumduman nga si Sayson maoy gitumbok nga mitulis ug mipusil patay ni Engr. Rexel Gonzales usa ka empleyado sa MEPZ 2 atol sa usa ka pagpanulis niini sa PUJ didto sa MEPZ 2 sa Tamiya Basak dakbayan sa Lapulapu niadtong May 22, 2009. – BANAT NEWS