Briton giunay'g kawat sa 'gikadulog'

CEBU, Philippines - Usa ka Briton ang giunay ug gikawatan sa iyang gika-date nga babaye diha sa usa ka resort sa barangay Maribago dakbayan sa Lapulapu kagahapon sa buntag.

Ang biktima mao si Crossan David Stuart, 41, British national ug temporaryong nagpuyo sa Maribago Blue Water sa samang barangay.

Sa imbestigasyon sa Crime Against Property Desk (kanhi TRS) si Stuart misumbong nga siya gikawatan sa usa ka babayeng iyang gikauban sa lawak nga iyang giilang usa ka “Catherine Salabao” apan wala matino kung asa kini magpuyo.

Si Stuart miingon nga iyang nakaila ang maong babaye sa usa ka tindahan sa dakbayan sa Mandaue ug sa dihang nagkasinabot sila iya kining gidala ngadto sa iyang gipuy-ang resort. Human sa ilang lawasnong kalipay nahinanok siya og katulog ug sa iyang pagmata mga alas 6:00 kagahapon sa buntag iya nalang nabatyagan nga nawagtang na ang iyang P35 mil nga cash ug ATM card. - Bong Soriano BANAT NEWS)