High-tech nga pagpanikas gibutyag

CEBU, Philippines - Gisugdan na ang inquiry sa house committee on electoral and electoral reforms and suffrage pinangulohan ni Makati City Rep. Teodoro Locsin Jr. ang giingong high-tech nga pagpanikas niadtong milabay’ng piniliay.

Sa report sa ABS-CBN News, usa ka witness nga wala hinganli apan miangkong usa sa gatosang ‘players’ aron manikas ang mihingalan kang Makati Mayor ug vice presidential candidate Jejomar Binay nga nalambigit sa tikas ug nakabenepisyo usab niini ang leading presidential candidate nga si Sen. Benigno "Noynoy" Aquino III.

Ang maong testigo mipasangil nga gisaaran ang ilang grupo ni Binay og bayad nga P1.7 bilyon bugti sa pito ka milyones nga botos. Apan wala sila bayri niini maong migawas siya.

Apan si Binay sa iyang bahin sa samang report kusganong mihimakak sa pasangil. Matud pa niini nga ang nakuha niyang botos resulta kini sa pagsalig sa mga tawo kaniya isip usa ka eksperiyensyadong local chief executive.

Ang maong testigo mibutyag nga ang ilang grupo nakakita og pamaagi unsaon pag-cutoff ang transmittal sa PCOS machines ug ang ilang gipasa ngadto sa Comelec central server kadto nang mga ‘gi-doktor’ nga resulta.

Si Melo sa iyang bahin nasurpresa sa video sa balita sa maong TV station sa usa ka maskaradong lalaki nga mialegar kabahin sa high-tech nga pagpanikas.

“This is obviously something to derail the elections. He does not identify himself. He does not give specifics... But here we are, he has not identified himself and he has not come out and we are all jumping out of our seats,” matud pa ni Melo atol sa inquiry.

Gawas sa duha, aduna pay laing testigo nga gikatakdang mogawas ug ang maong testigo maoy mopakita kun giunsa ang pamaagi sa pagtikas sa mga compact flash cards nga gialegar niini ‘preprogrammed’ nang daan aron paboran ang ‘mibayad’ nga kandidato.

Sumala pa sa report sa ABS-CBN News adunay duha ka mga testigos nga gikuptan si kanhi Solicitor General Frank Chavez nga nangangkon kabahin sa pagpanikas sa nakalabay’ng automated poll.

Usa sa mga gipresentar mao ang abogadong si Melchor Magdamo, nga nadestino diha sa buhatan mismo ni Comelec Chairman Jose Melo, samtang ang ikaduha mao si Arwin Serrano nga konektado sa electoral watchdog Parish Pastoral Council for Responsible Voting (PPCRV).

Ang duha mipasangil nga gituyo sa Comelec ang paglangay sa pag-testing sa compact flash cards nga gamiton sa Precinct Count Optical Scan (PCOS) machines aron wala nay panahon alang sa makuting testing ug pagkoriher sa mga makitang problema.

Ang duha mihatag og mga dokumento ngadto sa mga tigbalita ug mipasangil nga sa pagkalangay sa testing nakalugar ang mga operators nga makapanikas sa resulta.

Dugang pasangil nga ang mga Comelec officials nga nag-ranggo gikan sa director pataas nakasapi og binilyon sa 19 ka anomalosong mga transaksyon nga naglakip sa overpricing sa pagpalit sa ultraviolet (UV) lamps ug ballot secrecy folders. - gikan sa Wires  (BANAT NEWS)