'Rob Leader' tipi, 3 kauban nadakpan

CEBU, Philippines - Patay ang usa ka gidudahang robbery group leader atol sa shootout sa lungsod sa Carmen kagahapon sa kaadlawon sa gipahigayong operasyon sa joint team sa Criminal Investigation and Detection Group, Regional Mobile Group ug Regional Intelligence Division ug kapolisan sa lungsod sa Carmen.

Ang napatay mao si Joshua Paring nga gidudahang maoy lider sa grupo, residente sa barangay Catipan sa maong lungsod samtang giimbitar sa kapolisan ang gwardiya sa MLhuillier nga sila si Jesus Morales ug Melvin Sencio ug Rolando Gonzales Jr. tungod kay ang tulo diha man sa crime scene.

Ang awtoridad armado og search warrants batok sa lima nga sila si Joshua Paring, Rolando Gonzales, Jonidie Sanico, igsuon ni Joshua nga si Joel Paring ug Ramil Tuay diha sa barangay Sacon, Cogon West, Corte, Catipan ug Poblacion.

Si Joel Paring ug Tuay gibuhian ra sa kapolisan gumikan kay walay nakuhang ebidensya batok kanila.

Matud pa ni Sr. Insp. Ricky Neron sa CIDG-7 ang operasyon may labot unta sa search warrant nga giisyu ni Regional Trial Court Branch 10 Presiding Judge Soliver Peras batok sa lima labot sa pagtulis sa MLhuillier.

Unang gisiksik ang balay nila ni Joel Paring ug Ramil Tuay apan walay nakuhang armas gikan kanila apan nakadawat sila og impormasyong ang nangulo sa pagpanulis sa MLhuillier naa ra sa usa ka payag duol sa balay ni Joshua Paring.

Hinungdan nga ilaha kining gisusi apan giingong kalit silang gipusil ni Joshua Paring hinungdan sa nahitabong shootout, si Paring naigo sa nagkadaiyang parte sa kalawasan ug gidala sa Danao District Hospital apan gideklarar nga dead on arrival. Atol sa pakighinabi sa mga tigbalita ni Gonzales, mitug-an nga mensahero siya sa usa ka politiko sa 5th district. Matud pa ni Gonzales, base sa iyang nasayran si Paring maoy head guard sa M. Lhuillier gani motungha lang kini atol sa ilang inspeksyon.

Ang kapolisan nakakuha og armas gikan ni Joshua Paring nga kalibre .45 Armscor ug sa pagsusi sa bunkhouse niini nakuha usab ang kalibre .30 M2 Carbine Rifle, si Gonzales nakuhaan og kalibre .45 Colt Pistol, samtang si Sanico nakuhaan usab og .357 homemade revolver snub nose.

Laing nakuha sa kapolisan mao ang upat ka magazine sa kalibre .45 pistol, usa ka magazine sa kalibre .30 M2 Carbine Riffle, usa ka magazine sa KG-9 pistol; 41 ka buhing bala sa kalibre .45; 16 ka buhing bala sa .9mm; upat ka buhing bala sa kalibre .357; 22 ka buhing bala sa kalibre .30; unom ka buhing bala sa M14; samtang laing usa ka bala sa kalibre .50; duha ka Nokia cellphones, duha ka holsters sa kalibre 45, binandol nga kwartang nagkantidad og 12,900 ug mga sensilyong P1,700.

Matud pa ni PRO-7 director CSupt. Lani-O Nerez, kasong kalapasan sa Comelec Gun Ban ang ipasaka batok nila ni Sanico ug Gonzales. Samtang nasayran nga adunay pending warrant of arrest sa kasong attempted murder ang napatay. – BANAT NEWS