CEBU, Philippines - Gibana-banang mikabat sa 30-40 ka mga balay ang naugdaw sa nahitabong sunog kagahapon sa hapon sa sitio San Judas, barangay Tinago, dakbayan sa Sugbo diin mikabat ngadto sa P150 mil ang katibuk-ang danyos.
Ang alarma sa sunog nadawat sa kabomberohan mga alas 4:00 sa hapon ug nakontrolar ang kayo human sa 40 minutos .
Hinuon walay gikatahong naangol sa nahisgutang sunog gawas sa usa ka babaye nga nakuyapan.
Base sa imbestigasyon sa kabomberohan , nasuta ang kayo nagsugod sa ibabaw’ng bahin sa balay ni Mario Nuez, tanod sa maong barangay.
Dihang nahinabi sa mga tigbalita si Nuez nagkanayon nga nahibulong siya nga misilaob ang atop nga sin sa iyang balay nga wala man unta siya’y kuryente.
Apan matud ni Fire Marshal Ismael Codilla nga ilang gituohan nga adunay bata nga nagduwa og posporo nga maoy sinugdanan sa sunog.
Ang mga balay nga nasunog kasagaran ginama sa gaay nga materyal ug matud ni Codilla nga tungod sa kainit ug sa paghuros sa hangin daling mikuyanap ang kayo.
Ang kabomberohan naglisod sa pagsulod sa lugar tungod sa kahagip-ot sa agianan. – BANAT NEWS