CEBU, Philippines - Samdan ang abaga sa usa ka poultry boy dihang mao kini napusilan samtang miuwang sa nag-away niyang mga barkada didto sa barangay Baring, lungsod sa Carmen sa miaging kaadlawon.
Ang biktima mao si Chummy Rebonza, 19, ulitawo, katabang nga nag-atiman sa usa ka poultry farm nga gipanag-iya sa magpapatigayong Lhuillier didto sa maong lugar.
Samtang ang suspek mao ra usab ang iyang barkada nga si Rolly Basan, hingkod, usa ka construction worker, nga taga sitio Tabok Sapa barangay Luyang, sa maong lungsod.
Si SPO2 Renerio Masocol sa Carmen Police Station mibutyag sa Banat News nga si Otik, ang igsoon sa suspek, nagkaaway ug ang duha niya ka barkada atol sa ilang inom.
Busa miduol siya aron husayon ang ilang away, apan ang suspetsado kinsa milaban sa iyang manghod nga maoy gikaaway sa barkada niini, milanit sa iyang armas de fuego nga wala hisayri ang kalibre ug namusil dayon.
Hinungdan nga nasabak ang abaga sa biktima ug milapos usab kini sa iyang buko-buko.
Gihatod dayon ang biktima ngadto sa Danao District Hospital, samtang ang suspetsado nakasibat usab dayon ug mao kini gipangita karon sa kapolisan sa lungsod. – BANAT NEWS